ونىڭ ايتۋىنشا, 2025 جىلى تسيفرلىق ترانسفورماتسيا ءوفيسى قۇرىلىپ, وتىن-ەنەرگەتيكا كەشەنىنىڭ تسيفرلىق ترانسفورماتسيا كارتاسى بەكىتىلدى. سونىمەن قاتار اقپاراتتىق جۇيەلەر مەن دەرەكتەر مودەلدەرىنىڭ ماقساتتى ارحيتەكتۋراسى ازىرلەنىپ, EnergyTech بىرىڭعاي سالالىق پلاتفورماسىن قالىپتاستىرۋ باستالدى.
«2025 جىلى جاساندى ينتەللەكتكە نەگىزدەلگەن ەكى جۇيە پيلوتتىق رەجيمدە ءساتتى سىناقتان ءوتتى. ونىڭ ءبىرى – دروندار مەن جاساندى ينتەللەكتىنى قولدانۋ ارقىلى اۋە ەلەكتر بەرۋ جەلىلەرىندەگى اقاۋلاردى انىقتاۋ جۇيەسى. بۇل جوبانىڭ كۇتىلەتىن ەكونوميكالىق اسەرى 2,5 ملرد تەڭگەنى قۇرايدى. ەكىنشىسى – روبوتتاندىرىلعان كەشەن مەن جاساندى ينتەللەكت نەگىزىندە جىلۋ جەلىلەرىنىڭ قۇبىر ىشىندەگى اقاۋلارىن انىقتاۋ جۇيەسى. بۇل جوبادان كۇتىلەتىن ەكونوميكالىق تيىمدىلىك 42 ملرد تەڭگەگە باعالانىپ وتىر. قازىرگى ۋاقىتتا ەكى جوبا دا نورماتيۆتىك بەكىتۋ مەن اۋقىمداۋ كەزەڭىندە», دەدى باقىتجان ءىلياس.
ۆيتسە-ءمينيستردىڭ ايتۋىنشا, EnergyTech بىرىڭعاي پلاتفورماسى SmartGrid جانە SmartField كومپونەنتتەرىن قامتيدى. بۇل جۇيەلەر كيبەرقاۋىپسىزدىك تالاپتارىن ەسكەرە وتىرىپ, سالالىق دەرەكتەردى ونلاين رەجيمدە جيناۋعا جانە بەرۋگە مۇمكىندىك بەرەدى. ال QazTech پلاتفورماسىمەن ءوزارا ىقپالداستىق دەرەكتەر ساپاسىن ارتتىرىپ, جاساندى ينتەللەكت تەحنولوگيالارىن كەڭىنەن قولدانۋعا جول اشادى.
